Defendemos un territorio real, con nomes, historia, memoria e vida. Defendemos lugares como os Lagos de Teixeiro, Monte Castelo, o bosque de San Fitorio, a contorna de Ludrio e o Castro de Viladonga, porque forman parte da identidade desta comarca e da relación que a veciñanza mantén coa terra.
Defendemos tamén o patrimonio histórico e cultural que atravesa este territorio. O Camiño Rexio, sobre o que xa se realizou un traballo previo para o seu recoñecemento como itinerario oficial dos Camiños de Santiago baixo a denominación de Vía Rexia, non é só un percorrido: é unha pegada da nosa historia e unha mostra de como o territorio conserva memoria, usos e significado. Nesa mesma liña, o miradoiro de Monte Castelo conecta a paisaxe coa memoria e co relato de Ulf o Galego, engadindo valor histórico e simbólico a un espazo que tamén merece ser respectado e coidado.
Defendemos a biodiversidade con feitos. Antes mesmo de constituírnos como asociación, organizamos o I Bioblitz dos Lagos de Teixeiro para poñer en valor a riqueza natural da zona. Nesa iniciativa rexistráronse 558 observacións de fauna, flora e micobiota en espazos como Lagos de Teixeiro, San Fitorio, A Meda e Barredo.
A partir dese traballo púxose en marcha tamén un proxecto paraugas en iNaturalist que abrangue esta contorna e que inclúe o propio Bioblitz, co obxectivo de seguir incorporando observacións e coñecemento ao longo do tempo. Porque comprender mellor a riqueza natural deste territorio tamén é unha forma de defendelo.
Defendemos tamén o dereito da xente a vivir con dignidade nos lugares que habita. Por iso denunciamos proxectos como a subestación prevista en Ludrio, que se pretende situar a poucos metros de vivendas e negocios, sen o respecto nin a consideración que merece a vida cotiá da veciñanza.
Defendemos, ademais, o sentido do investimento público feito para poñer en valor este territorio. As administracións destinaron recursos de todas e todos para mellorar e destacar espazos como os Lagos de Teixeiro, o miradoiro de Monte Castelo ou o trazado da Vía Rexia. Permitir agora que proxectos destas características deterioren ou desfiguren ese patrimonio sería tamén malgastar cartos públicos investidos precisamente en conservar, explicar e dignificar a riqueza natural, paisaxística e cultural da comarca.
Defendemos os medios de vida no rural, a paisaxe, o patrimonio natural e cultural, os camiños, as traídas, os nomes dos lugares e a posibilidade de que as xeracións que veñen poidan seguir habitando esta terra. E defendemos, por enriba de todo, o dereito das comunidades a seren informadas, escoitadas e tidas en conta desde o inicio nas decisións que afectan ao seu territorio.