Asociación polo territorio, a memoria e a vida no rural
Defendemos a terra, a vida no rural e o futuro das nosas comunidades
Raíces do Vento é unha asociación de veciñas e veciños afectados que, de forma voluntaria, se organizan para defender o territorio, a biodiversidade, o patrimonio e os medios de vida no rural fronte ao impacto dos proxectos eólicos e das súas infraestruturas asociadas en Castro de Rei, Lugo, Pol, Castroverde, Riotorto, Meira, Begonte e outros concellos da contorna.
Cremos nun futuro con enerxías limpas, si, pero tamén con planificación, respecto e participación real. O rural non é un espazo baleiro: é vida, memoria, cultura, natureza e futuro.
O que está en xogo
Non falamos só de aeroxeradores, liñas ou subestacións.
- da vida no rural e da continuidade das comunidades
- da biodiversidade, da auga e da paisaxe
- da memoria, do patrimonio e da identidade do territorio
- do dereito a unha transición enerxética xusta e ordenada
Porque o que está en xogo non é só unha infraestrutura: é a posibilidade de seguir habitando esta terra con dignidade.
Que podes consultar
Ameazas
Unha explicación clara dos impactos acumulativos destes proxectos sobre o territorio, a veciñanza, a biodiversidade e o patrimonio.
Propostas
As alternativas que defendemos: ordenación do territorio, protección real dos espazos sensibles, autoconsumo e xustiza enerxética.
Quen somos
Quen forma Raíces do Vento, de onde nace a asociación e por que decidimos organizarnos.
Unha asociación veciñal, voluntaria e aberta
Raíces do Vento sostense no traballo voluntario de veciñas e veciños que decidiron unirse para defender o territorio. Ninguén cobra polo labor que se fai na asociación: o que hai detrás é tempo, compromiso e vontade de sumar forzas de maneira altruísta arredor dunha causa común.
Non somos unha organización partidaria nin respondemos a unha liña política concreta. Reunímonos coas administracións públicas sexa cal sexa o partido que as goberne, porque entendemos que as institucións son de toda a veciñanza e teñen a responsabilidade de escoitar e atender o que afecta ao territorio.
Raíces do Vento é tamén un espazo aberto a persoas con ideas e sensibilidades distintas. O que nos une non é pensar igual en todo, senón compartir a defensa do territorio, da vida no rural e dos principios recollidos nos nosos estatutos.
Súmate
Se compartes esta preocupación e queres apoiar un traballo veciñal, voluntario e aberto, podes informarte, participar e axudar a facer máis forte esta rede.